سؤال و جواب (٢): أريد أن أسافر و لكن ..

س: طيب أنت عجبك موضوع إن البنت تسافر لوحدها تدرس؟ج: لا طبعا

س: طيب اشمعنا الولد؟ج: من قال إني عاجبني .. لا طبعا برضه

س: طيب يعني اللي عايز يسافر يعمل ايه؟ج: يتزوج

س: من فين و كيف؟ج: أعتقد أي حد طلع منحة يقدر يصرف على شريك

س: لكن المرتب قليل جداً من المنحة؟ج: و ماله .. يعيشوا على قدهم .. هو في أحلى من الكفاح و الاعتماد على النفس

س: لكن تفتكر الأهالي يوافقوا؟ج: يا سيدي أنت و شطارتك .. يعني خلي عندك طموح و بساطة و ستجد شريك كويس

س: طيب و الشقة .. مفيش!ج: ما أنتم هتسكنوا بره .. عايزين شقة ليه و عفش .. و أبقى قضيها مع أهلك في الأجازة شوية و مع أهل الشريك شوية .. أو أجر حاجة في أسبوعين الأجازة .. ده لو نزلت

س: طيب و المهر و الشبكة؟ج: حاجة بسيطة و بعدين لما ربنا يسهل أبقى اكرمها .. و بعدين هم لما يشوفوا عندك طموح أكيد ربنا سيكرم

س: طيب أنا دورت و ملقيتش؟ج: ما هو سيادتك اللي مش عارف تدور .. 

س: طيب عندك حل ؟ج: بصراحة مش قوي لكن فعلا يهمني نشوف حاجة للمهتمين بالتعليم و العلم و طريقة تربط بينهم بدون خلل أو إحراج .. لو عندك فكرة قل لي

س: ايه رأيك نعمل موقع؟ج: مش عارف .. مش مقتنع .. و بعدين الموقع ده كيف تعرف منه أهل الشريك

س: و الأهل مهمين ليه؟ج: مهمين طبعا .. مش زرعوا و حضرتك ستحصد تعبهم في التربية .. على الأقل اسأل عنهم

س: بس أنا أهم شئ عندي الشريك؟ج: لا أختلف معك .. لكن لو الموقع وضعنا عليه معلومات الأهل و حصل الأب أو الأم على تنبيه "notification" إن في حد مهتم يزورهم يبقى الموضوع فيه رقابة معقولة

س: ايه ده .. مش ده كده يبقى زواج صالونات؟ج: لا كده زواج مواقع  .. أما انت اقرع و نزهي صحيح .. الحق عليا أني عايز أساعدك

س: طيب خلاص خلاص .. طيب أنا هفكر أكثر في ازاي نعمل شبكة علاقات مبنية على طموح مشترك و ارجع أسألك .. تمام؟ج: ماشي .. سكتك خضرا